冬天最常用嘅，莫過於羽絨褸啦，但好多朋友都忽略咗羽絨褸保養嘅重要性。點樣令自己屋企件羽絨褸保持光鮮同保暖呢？等我嚟同大家講下啦。

羽絨褸點樣洗五大經驗

經驗一：一定要手洗喺羽絨褸嘅內側，通常都會有個車咗保養同洗滌說明嘅細tag仔。細心啲嘅人就會發現，九成嘅羽絨褸都寫住要手洗，千祈唔好乾洗，因為乾洗用嘅藥水會影響保暖度，亦都會令到啲布料老化。而機洗同埋fing乾，件羽絨褸俾部機扭完攪完之後，好容易搞到入面啲羽絨一忽厚一忽薄，令到件衫走晒樣，影響個樣同埋保暖度。


經驗二：30度水溫過水首先將件羽絨褸放入凍水度浸20分鐘，等件褸入面同外面都濕透。將啲洗衣液/洗衣粉溝落30度嘅溫水度，再將件羽絨褸放入去浸15分鐘，然後用軟毛刷輕輕咁刷。過水都要用溫水，咁樣可以幫到啲洗衣液/洗衣粉充分溶解喺水度，可以將件羽絨褸過得乾淨啲。



經驗三：用洗衣粉濃度唔可以太高，如果真係要用洗衣粉洗羽絨褸，通常兩盆水落4到5湯羹洗衣粉就差唔多。如果濃度太高，就好難過得乾淨，羽絨入面殘留嘅洗衣粉，會影響羽絨嘅蓬鬆度，大大降低保暖能力。


經驗四：最好用中性洗衣液/清潔劑，中性洗衣液/清潔劑對布料同羽絨嘅傷害最細。用鹼性洗衣液/清潔劑嘅話，如果過水唔乾淨，殘留嘅清潔劑會對件羽絨褸造成損害，而且好容易喺件衫表面留低啲白色漬，影響個樣。想整走殘留嘅鹼性清潔劑，可以喺過完兩次水之後，喺溫水度加兩茶匙食醋，將件羽絨褸浸一陣再過水，食醋可以中和返啲鹼性清潔劑。

 
經驗五：唔可以扭乾，羽絨褸洗好之後，唔可以扭乾，應該將啲水份擠出嚟，再攤平或者掛起晾乾。唔好暴曬，亦都唔好熨，廢事熨燶件衫。晾乾之後，可以輕輕拍打下，等件羽絨褸變返鬆軟。

 

想知更多衣物保養小貼士，請留意iGift網，多謝收睇。


#羽絨褸 #羽絨保養 #手洗技巧 #衣物護理 #iGift #冬季衣物 #洗衣知識 #中性洗劑 #防寒保暖 #正確晾曬